【我老豆係民建聯】/Edkin

世界上有很多種可能,其中一種,係咁啱,老豆係民建聯。

民建聯係一個奇怪既組織,佢係政黨,經常為政府保駕護航。但係又唔係執政黨喎,成員幾出力做嘢,個黨魁都唔係政府阿頭,只不過係政府(政權)手下既戰鬥機器。於是,好聽,就叫打手,唔好聽,就係走狗。

打手又好走狗又好,其實冇壞,都係一份工啫。諸君自省,可能我地大部分人份工都係盲起眼跟住老細支旗做事,一樣好狗。不過又咁啱,香港政府又不得人心,做事往往與民意相反,民建聯既角色就多添一份「奸」味,即係奸狗。

奸狗都唔緊要,民建聯最無敵既係佢重要面。譬如話,佢個agenda係要頂住取消TSA既聲音,但係又唔敢公開講,於是唯有口講反對,身體就否決咗個動議,轉頭又出post話泛民否決諸如此類。

究竟係支持定反對?媽我好亂。

Screenshot_2015-12-01-16-44-42-1

最新嗰招,係揾埋自己個女出嚟撐場。人人對TSA都媽聲四起,唯獨係呢位小朋友話好easy,唔使練,冇壓力,當做練習咁做,喎。

我呢啲一介凡夫俗子,個女天生魯鈍,做功課喊打喊殺,考試全民皆兵,當然無法理解天資聰穎成績優異既小朋友既平衡宇宙。 不過如果可以,我始終都希望多一點時間同細路仔游水跑步踩單車。學文友Mayi話齋,成長先至係小朋友既正經事。

但係最陰公豬既係,學校第二朝就即刻出聲明,話學校支持取消TSA,家長投票都有59%話要取消。用陶傑既口頭襌講:完全係兜巴打面,情何以堪?

不過呢個世界係有好多可能,其中一種就係老豆係民建聯。有好多野有得揀,但係邊個做老豆係唔使揀。老豆係民建聯,好奸狗,連自己第一次演說都比佢騎劫咗去。 不過又唔好太負面,用另一個角度睇,可能先至真係贏在起跑線。

你諗吓,即使可以廢除TSA,呢個政府依然會死心不息,改頭換面推個TAA,TBA,TQA… 出來,你反對得幾多次? 好似國民教育咁,名亡實存。 唔好唔記得吳克儉係做HR,TSA 即係搞Audit,將人當做資源辦,佢會放過你唔使做Audit?No way!你一日係香港讀書,一日都逃離唔到呢個魔咒。

1448088197262_7DD4F1DF7501D38A1CFE777A302CEB21.jpg

相反,老豆賣女一次,如果換嚟人生飛黃騰達,咁就可以好似政府所有高級官員一樣送仔女去外國讀書免受苦難。到學成歸來,十歲都未夠就開始為政府服務,正是根正苗紅。如果老豆搭通天地線,做個青年民建聯,咁小則做個區議員,多則做個政治助理,幾乎十萬蚊人工,一班廢青同學先啱啱fresh grad,捱緊一萬幾千,小妹已經上岸。

好奸狗?到時做咗中環精英,係文華歎住high tea,真係天堂都已經為我準備好地方。狗?狗得過你要住劏房?狗得過你既仔女既仔女都重繼續要係香港讀書?你睇劉江華就知道,做到奸狗,先至係人中之龍,符合香港新秩序。大哥,香港有幾多人可以好似劉江華咁樣日日等出近三十萬糧,又無乜野需要緊張先?

20141228eee

所以諗真啲,講乜野都假,十八歲入民建聯都嫌太遲,加入兒童民建聯先至係為將來鋪上康莊大道。等陣,唔好急住,而家未有得正式加入,你搵個陳仲翔咁既老豆或者李慧琼咁既老母先啦,privilege嚟架。

p.jpg

作者Facebook專頁:https://www.facebook.com/edkinphoto

廣告

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s